Friday, November 26, 2010

අපේ බස් ගැන මට හිතෙන දේ.......



අදත් හෝ ගාල වැස්ස, කුඩේ අරන් ගිය නිසා යාන්තම් වැස්සෙන් බේරිල බස් හෝල්ට් එකට ඇවිත් 187කට ගොඩ උනා. සීට් එකකුත් තිබ්බ නිසා මම ජනේලයක් අයිනට සෙට් වෙලා වැස්ස දිහා බලාගෙන, වැස්ස ගැනම කල්පනා කරන්න ගත්ත. ඔය අතරෙ කොන්ද අයිය ඇවිත් මගෙ කල්පනා ලෝකයට ඩිස්ට(ර්)බ් කරල ගාස්තුව ඉල්ල ගත්ත, ඉතින් ආයෙත් මම පාර දිහා බලාගෙන කල්පනා කරන්න සෙට් උනා විතරයි මෙන්න වාඩ් වෙලා හිටපු මගී ඩයල් එකක් කෑ ගහනව "මේ බස් එක කටුනායක ඉදන් පෑලියගොඩට එන්න, නුවර ඉදන් කොළඹ එන වෙලාව ගත්ත" කියල.

ඒ කතාවෙ සත්‍ය අසත්‍ය තාව කෙසේ වෙතත් සුපුරුදු විදියටම සෙසු මගියො ටික ලොවෙත් නැති ගානට ඇහුන්නෑ වගෙ කරබාගෙන හිටිය.  මට ඉක්මනට ගිහින් අල්ල ගන්න අලි නැට්ටක් නැති උනාට අර මගී ඩයල් එක ගැන දුක හිතුන.

බස් වල වෙන දේවල් වල හැට්යට බස් හෙමින් යාම බොහොම සුලභ රෝගයක්. ඒ  ගැන හොයල බලන්න මොකක්ද සංගමයක් තිබුනට ඒ ගොල්ලො වැඩක් කරනවද නැද්ද කියන එක මම නම් දන්නෙ නෑ. හෙමින් යාම ගැන කොන්ද මල්ලිගෙන් අහපු මගියෙකුට දවසක් කොන්ද මල්ලි "එහෙම යන්න ඕන නම් තමන්ගෙ වාහනයක් ගන්න" කියල ආදරෙන් කිව්ව එක මට මතක් උනා, ඒ වෙලාවෙ නම් මගියො සෙට් එකටම අසූ හාරදාහට තද උනත් කොන්ද මල්ලි කියපු දේ සෑහෙන ඇත්ත බව පස්සෙ මට තේරුන.

බස් සේවාව පාලනය භාර කස්ටිය නම් සෑහෙන කාලෙකින් බස්වල ගිහින් නැති බව පැහැදිලියි. රුපියල් නමයෙ ටිකට් එකේ ඉතුරු සල්ලි දෙන්න අමතක වෙන සමහර කොන්දොස්තර මහත්තුරු සහ හයේ ටිකටි එකට මාරු ඉල්ලන කොන්දොස්තර මහත්තුරු එක්ක නහුතෙටම තද උනාට ඔය ටිකට් වල ගනන් මාරු කරන්න පුඵවන් උනා නම් කියලත් මට හිතුන. හයේ ටිකට් එක පහ කරල නමයෙ ටිකට් එක දහය කරන එක  සෑහෙන ලොකු වැඩක් වෙන්න ඇති. (බස්වල ඉතුරු සල්ලි ගන්න ගියාම සමහර කොන්දල දාන ලුක් එකයි සල්ලි දෙන විදිහයි දැක්කම මාර ආදරයක් ඇතිවෙන නිසා මම ඒක අතෑරිය)

ලංකාවෙ ප්‍රයිවට් බස් වල සෑහෙන දියුණු තාක්ෂණයක් භාවිතා වෙනව කියන එකත් මම හොයාගත්ත, වෙන බස් එකක් පේන තෙක් මානෙක නැත්නම් (විශේෂයෙන්ම ලංගම බස් එකක් පේන තෙක් මානෙක නැත්නම්) ප්‍රයිවට් බස් ඉබේම ස්ලෝ වෙනව, ඩ්‍රයිවර් අයිය මොනා කරත් ඒක යන්නෙ හිමින්, හැබැයි පිටිපස්සෙන් බස් එකක්  එනව දැක්ක ගමන් ඩ්‍රයිවර් අයියටත් කන්ට්‍රෝල් කරන්න බැරි විදිහට බස් එක යන්න පටන් ගන්නව, ලේන් කපාගෙන ඕවර් ටේක් කරන ගමන් හෝල්ට් පාස් කරන් ගිහින් නවතින බස් එක පාලනේ කරන්න ඩ්‍රයිවර් අයිය මොනා කරත් වැඩක් වෙන්නෙ නෑ. (මේ ගැන අපේ මගියො කරනව වගේ මාත් ඉස්සර කෑ ගැහුවට මේ ඔටෝමැටික් සිස්ටම් එක ගැන දැනගත්ත දවසෙ ඉදන් මම ඒකත් නතර කර ගත්ත).

ප්‍රයිවට් බස්වල කොන්දොස්තර පෝස්ට් එකට ගන්නෙ මැනේජ්මන්ට් ඩිග්රි එකක් තියෙන මහත්තුරු කියන එකත් ප්‍රසිද්ධ රහසක්. නාසා එකෙන් දන්නව නම් රොකට් එකක වැඩි බඩු තොගයක් අහුරන්න අපේ  කොන්ද මල්ලියෙක්ව කිඩ්නැප් කරන එක ෂුවර්.

කෙනෙක් නැති තැන වැරදි කියන එක හොද නැති නිසාත් බස්වල සේවක මහත්තුරුන්ට බැන්නට  මගියොත් බස්වල පිස්සු නටන නිසාත්  මේව පාලනය කරන්න නීති තිබ්බට  නීතිය පොතට විතරක් කියල හිතෙන නිසාත්  මේව හොයල බලන්න ඉන්න කට්ටිය  බස්වල නොයන නිසාත්  මම ආයෙත් වැස්ස දිහා බලාගෙන කල්පනා කරන්න ගත්ත.

No comments:

Post a Comment